ممتاز فکری سکالر ڈاکٹر ظفر اقبال نوری ( امریکہ ) کا انتہائی وجد آفریں تاثراتی سلام ‏

ممتاز فکری سکالر ڈاکٹر ظفر اقبال نوری ( امریکہ ) کا انتہائی وجد آفریں تاثراتی سلام 

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

حسین راہی ، حسین رستہ، حسین منزل

٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭

ھدیۂ اشک ہائے بے وقعت بہ بارگاہِ دیں پناہ ، شہزادۂ گلگوں قبا سیّدالشّہداء سیّدنا امام حسین علیہ السّلام

•••••••••••••••••••••••••••••••••••••••

یہ کون آیا تھا اس نگر میں

یہ کون گزرا تھا اس ڈگر سے

کہ جس کے خوں سے نچڑتے قدموں کے جگمگاتے

نشان اب تک چمک رہے ہیں

مہک رہے ہیں

یہ کون آیا تھا اس نگر میں

کہ جس نے آکر

رہِ خدا میں یوں سر کٹا کر

ستم زدوں کے ستم مٹا کر

اصولِ فتح و شکست سارے

نئے سرے سے رقم کیے تھے

————-@—————-

••••••••••••••••••••••••

وہ دیکھو دیکھو لعین دشمن

جو اس کے گرنے کے منتظر تھے

انھوں نے اس کے حسین سر کو

بنوکِ نیزہ سجا کے اپنے

سروں سے اونچا اٹھا لیا ہے

وہ نیچے سارے کمینہ فطرت

جو پست ہمّت تھے رینگتے ہیں 

مگر وہ اعلٰی وہ سب سے بالا

فرازِ نیزہ پہ مسکراتا

کتابِ حق جو سنا رہا ہے

نژادِ نو کو وہ تا قیامت

دلیلِ منزل دکھا رہا ہے

———-@————-

•••••••••••••••••••

یہ کون آیا تھا اس نگر میں

کہ جس کے گلگوں حسین رُخ پر

جمالِ احمد تھا جھلملاتا

وہ جس کے لہجے میں اک ابھرتا 

یقین پرور جلالِ حیدر

بہ ہر زماں یہ بتا رہا ہے

یہی تو ہے دوشِ مصطفٰی کا

حسین راکب، دلوں کا سرور 

وہ پُورِ زہراء وہ نُورِ حیدر

نبئ اکرم کی چاہتوں کا

محبتوں کا جمیل محور

نبئ اعظم کی عظمتوں کا

بلند ہوتا عظیم مظہر

دبیز صدیوں کے سارے پردوں

میں بھی ابھرتا وہ جگمگاتا

یہی ہے میرا عظیم رہبر

یہی ہے سیّد ،یہی ہے سرور

حسین حسنِ جمالِ زہرا ء

حسین نُورِ جلالِ حیدر

حسین اوجِ کمالِ احمد

حسین میرا دلوں کا سَروَر

————@—————

••••••••••••••••••••••

حسین ہستی کا حُسن لوگو

حسین ہمّت کا اک حوالہ

حسین جراءت کا استعارہ

وہی عزیمت کا اک ہمالہ

حسین عزم و یقیں کا پیکر

حسین صبرو رضا کی حُرمت

حسین بزمِ وفا کا دولہا 

حسین ملکِ بقا کا والی

وہ دیکھو بے سمت کربلا میں

حسین راہی

حسین رستہ

حسین منزل

—————-@—————-

••••••••••••••••••••••••••

وہ دیکھو میدانِ کربلا میں

اسی کے جھنڈے گڑے ہوئے ہیں

وہ دیکھو اس کے جگر کے ٹکڑے

جو خاک و خوں میں اٹے پڑے ہیں

کہیں پہ بیٹے ، کہیں پہ بھائی

کہیں بھتیجے ہیں بھانجھے ہیں

وہ سر بریدہ بدن دریدہ

وہ پھول چہرے ، گلاب جثّے

جو پتّی پتّی بکھر گئے ہیں

مگر وہ اس دشتِ خاک و خوں میں

جفا پرستوں ستم سرشتوں

کمینہ اعداء کے لشکروں کے

مقابلے میں

یکا و تنہا 

پہاڑ بن کر وہ تشنہ لب بھی 

رہِ وفا میں کھڑا ہوا ہے

اسے خبر ہے

بس ایک لمحے کی بات ہے یہ

کٹے گا اس کا سرِ مبارک

پسِ شہادت

جلیں گے اس کے خیام سارے 

تو پھر سراپا حیا و غیرت

وہ پیکرانِ صفا ، طہارت 

وہ پا بجولاں وہ سر برہنہ

مشقّتوں میں اسیر ہوں گے

مگر وہ پھر بھی

ڈٹا ہوا ہے

یقیں کا پرچم گڑا ہوا ہے

—————@——————

••••••••••••••••••••••••••

صفِ مظالم سے دیکھو ابھری

وہ باڑ تیروں کی سنسناتی 

حسینُ مِنّی کے جسدِ اطہر

سے پار کیسے اتر گئی ہے

حسین میرا لہو نہایا

یوں اپنے دُلدُل سے نیچے آیا 

یزیدیت کے پلید لشکر

یہ تک رہے ہیں

سمٹ رہے ہیں 

دبک رہے ہیں

اور ایسے عالم میں دن کا سہما

اداس سورج بھی ڈھل رہا ہے

حسین میرا امام میرا

نماز کو اب سنبھل رہا ہے

لہو لہو ہے

وجود سارا ، ہے زخم خوردہ

مگر وہ پھر بھی یہ سوچتا ہے

کہ سمتِ کعبہ ہے کس طرف کو

میں ایسے غمگیں

اداس منظر میں سوچتا ہوں

کہ میرے ربّ نے

ندا دی ہوگی

مرے نبی کے عظیم بیٹے ، حسین میرے

نہ دیکھو تم یہ

کہ سمتِ کعبہ ہے کس طرف کو

گھڑی لقا کی ہے سر پہ آئی

گھڑی بقا کی ہے سر پہ آئی

ہے وقت سجدے کا آن پہنچا

نہ تم یہ سوچو کدھر ہے کعبہ 

خدائے کعبہ یہ دیکھ لے گا

کہ سجدہ کرتے حسِین ساجد، حسین میرے کا سر کدھر ہے

———————@——————————

•••••••••••••••••••••••••••••••••••••••

حسین کو جب خدا نے بخشا 

عروج ایسا کمال ایسا

تو اس کے ظالم ، کمینہ دشمن کے سر پہ اترا

وہ ذلّتوں کا وبال کیسا

حسین نے اس حسِین لمحے

حضورِ خالق جو سر کو رکھا

اک لعیں نے آگے بڑھ کر

سرِ مبارک کو تن سے کاٹا

زمیں لرزی

وہ عرش کانپا

تمام عالم کی چیخ گونجی

حسین اپنے لطیف سر پر

شہادتوں کا یوں تاج پہنے

بقا کی منزل کو جا چکا تھا

ستم گروں کو مٹا چکا تھا

شکست و نصرت کا منفرد وہ

اصول عالم کو دے گیا تھا

—————@————-

•••••••••••••••••••••••

حسین ہستی کا حسن لوگو 

حسین ہمّت کا اک حوالہ

حسین جراءت کا استعارہ

وہی عزیمت کا اک ہمالہ

حسین عزم و یقیں کا پیکر 

حسین صبر و رضا کی حُرمت

حسین بزمِ وفا کا دولہا

حسین ملکِ بقا کا والی

وہ دیکھو بے سمت کربلا میں

حسین راہی

حسین رستہ

حسین منزل 

—————@—————

••••••••••••••••••••••••

غبارِ راہِ کربلا

ظفر اقبال نوری